أسئله جاءتني علي الإيميل الخاص و علي إيميل المدونه

يعني هو المتحرش ده هيدور علي المدونه عشان يعرف إن ده غلط؟
- هو انتي يعني لو موجوده ف الكليه مثلا يقدر حد ييجي جنبك؟
- أقل واحد فينا كان أكل الحيوان ده علقه محترمه
......
- و هي يعني المدونات هي اللي هتصلح البلد؟؟؟
- و لا عاوزه تعملي مدونه تحققي بيها شهرة و خلاص؟
- الفكرة جريئه بس جريئه أوي
- ميصحش تطلع من بنت
- مخفتيش من أي إشاعه؟
- هو انتي عندك كام سته يعني عشان تعملي مدونه تتكلم عن التحرش ؟؟
- الفكرة كويسه بس متنفعش في مجتمع متخلف زي ده ...
----------------------------------------------------------------------------
دي بعض الاراء و التعليقات و الجمل اللي جت لي في الايميلات
او عن طريق المسنجر الشخصي بعيدا عن ايميل المدونه
-------
الكلام يصدم و في نفس الوقت ممكن نقتنع بيه
و حبيت إني أوضح الهدف من إنشاء المدونه عن طريق الاجابه علي الأسئله اللي تم توجيهها لي

يعني هو المتحرش ده هيدور علي المدونه عشان يتعلم؟
ومين قال ان احنا كمدونين بنكلم المتحرش فقط؟؟؟
احنا بنكلم الكل عشان يحس بالمشكله و يتفاعل ... فكل انسان يقرأ هذه السطور يغير في محيطه بشكل أو بآخر و هكذا يمكننا علي المدي البعيد تغيير الغالبيه إلي الطريق السليم

- هو انتي يعني لو موجوده ف الكليه مثلا يقدر حد ييجي جنبك؟
أكيد لأ أو غالبا لأ
بس ممكن أوي أبقي في أي مكان تاني و أسمع كلمة تخدش حيائي أو أري نظرة غير محترمه ... الموضوع مش بس في النطاق الضيق ده النطاق ده أوسع من أننا نتكلم فيه كده

- و هي يعني المدونات هي اللي هتصلح البلد؟؟؟
أنا عاوزه أقول إن لو المدونات علي أيام الأحتلال كان زمانها بدل المنشورات
و زي ما الفكرة دي احتلت عقول بعض الرجال و الشباب
" البنت متقدرش تتكلم "
لازم نشيلها من عقولهم عشان أصحاب النفوس الضعيفه يفكروا ألف مرة قبل ما يقدموا علي الفعل المشين ده

- و لا عاوزه تعملي مدونه تحققي بيها شهرة و خلاص؟
أولا أنا فعلا نشرت المدونه بس مش عشان تشتهر لا عشان الفكرة تنتشر و لأني مؤمنه بالفكرة جدا
و أعتقد إني محطتش اللينك للبروفايل
لأني لا يهمني في هويتي في هذه القضيه إلا أني إنسانه

- الفكرة جريئه بس جريئه أوي
أولا أنا مستغربه أوي من الجمله دي
جريئه الأولي أعتقد معناها شجاعه
أما التانيه إيه؟؟؟ ... الأفكار عموما اللي زي دي يجب أن يتم طرحها بطريقه جريئه و لا أحد يخجل من جرحه
و إلا سبب له التاعب و تفاقم الأمر حيث لا يفيد أي علاج

- ميصحش تطلع من بنت
الجمله دي فزعتني ... ليه؟ هي البنت دي مش بني أدم؟ و مش من حقها تتكلم؟
و ردي عليها لا تعليق

- مخفتيش من أي إشاعه؟
أولا في رأيي الشخصي ... اللي يمشي ورا كلام الناس عمره ما يرتاح ... و كده أو كده الناس بتتكلم يبقي أعمل اللي يريحك أنت و الناس خليهم بس يقيموا أو يقولوا رأيهم في الآخر لكن ... متديش للناس و كلام الناس حق القرار بدل منك

- هو انتي عندك كام سنه يعني عشان تعملي مدونه تتكلم عن التحرش ؟؟
أنا مش بتكلم عن التحرش كعالمه أو دارسه
أنا بتكلم عنه كإنسانه يجب أن تدافع عن حقها و تنادي الآخرين بالدفاع عن حقوقهم
و أنا قلت إني إنسانه يعني السن مبيفرقش بين إنسان و التاني

- الفكرة كويسه بس متنفعش في مجتمع متخلف زي ده ...
أولا المجتمع المتخلف ده ... هو إحنا و طالما فيه ناس في مجتمع متخلف و هما مش متخلفين و ســـاكتيــــــــن
يبقي هما كمان متخلفين بس بالسلبيه اللي هما فيها
و بعدين لما مجتمعك متخلف و انت متحضر ليه متغيرش ولو سنتيمتر لقدام أكيد لو تكاتفنا في أي شيء السنتيمترات هتتحول لطرق يحف النور جانبيها

و ياريت اللي عنده رد آخر علي هذه الأسئله يقول ... أنا بس عملت التعليقات مراقبه لسبب بسيط حتي لا يتم نشر تعليق غير لائق أو غير محترم يحتوي علي ألفاظ غير محترمه
-----------------------------------------------------
و أخيرا أحب أوضح الدافع اللي خلاني قمت بعمل المدونه دي:
إيميل جالي من واحده كانت عجبتها إحدي مدوناتي الأخري
و قامت بإضافتي و قصت علي قصة تحرش حدثت لها
و طلبت أن أثير هذه القضيه في بوست من البوستات علي أي مدونه
و لكني رأيت أن موضوعا كهذا لا يكفيه تدوينه واحده و لكن يحتاج أكثر من مدونه

-------------------------------------------------------

أحب كمان أقول لكل المدونين اللي عرضوا المساعده
يا ريت كل البلد زيكم كانت اتغيرت عن كده ومكناش احتاجنا الا للمدونات الشخصيه

و شكرا